FAMILY DRAMA!!

Ka piengna chu khuote a ni a, khawpui chu hla rak lo a nih. Nitinin ka nu le pa chu kan huon/ram ah sin an thaw hlak a.

Nuhmeite naupang titak ah ni khat chu RAWMAWL (Hankerchief) ka dit em em a, ka ruol dang nuhmeitehaiin an nei vawng lei ning a tih. Ka pa pawisa chu cheng sawm kan ruk el ta a. “Tum ka sum inruk?” ti’n ka pa a hrang vel chu ka ti taluo a, ka ip tlat a. “In mi hril naw chun ka vuok ve ve ding cheu a nih” a ti chun, ka sangpa’n ka Pa ban ah chelin “Pa, kei ka nih” a ti a, ka sangpa chun ka thil suksuol chu a mawphurin hrem a tuok el ta a.

Zanthang lai chun ka tho dawk a, ka tap rak el ta a, ka sangpa chun “ ka hmur ah mi hup pekin “Uu, thil liem ta hnunghai chu theinghil rawh” a mi ti pek a. Ka sangpa’n a mi humhim laia a hmelput kha iengtik khawm theinghil ngai ta nawng ka tih. Chuong hun lai chun ka sangpa chu kum 8 an ta a, kei ruokchu kum 11 ka ni tah. Thudik tak hril ngam lo a ka dawizep el kha vawisun ni chen khawmin ka lan sir zing. Kha thil kha ka ngaituo changin ka lungril ah zani lai angelin a lan lang zing hlak a nih.
Ka sang chu pawl sawmpahni thatakin a zo a, keikhawm university a ding chun admission an mi phal pek a. Chu zan chun ka nu le pa lungril chu a sawl hle a, ka pa’n “ Ei nauhai chu hlawtlingna thatak an dawng a ni a” a vel velin a hril a. Ka nu’n Ieng am a hlawk a? An pahni’n iengtin am ei enkawl zo ding a na? “ a ti a. Chuonglaichun ka sangpa chu kan room a inthawk tho dawkin ka nu le pa kuom ah “ Kei chu lekha ka tiem rawnin a huntawk ta tho a, kan chuk zawm pei ta nawh” a va ti chun, ka pa’n “ Iengdinga tumna chautak I nei am a na? Intin ah kutdaw a tul khawmin chawm ka cheu a, in pahni’n in inchukzo ding a nih” ti’n a dawn a.

Ka sangpa biengchu date’n ka tuoi a, tlem tumin “ Ngo, nang chu pasal I na inchuk zawm naw chun iengtin am ei insung harsatna a inthawkin suok dawk thei ei ta, nang inchuk lem ding a nih, kei ka thutlukna chu kei inchuk zawm ka tum ta nawh” ka ti pek a.

Zingkar inhmatak chun ka sangpa chu a thuomnaw tlawmte a nei le bezeu chu chawiin tukhawm kan hriet lovin kan In chu maksanin khawpui tieng chu a pan el ta a. Lekha chite ah “ Uu, university a admission hmu chu thil awlai a ni nawh. Feng ka ta, sinthawin pawisa ka hung thawn hlak ding che a nih” ti a lo inziek a. Chu lekha te chu ka awmah kuo detin ka dittawkin ka rawl bo chen ka tap rak rak el tah a.
Chuongchun ka pa’n sum a puk le ka sang construction a cement bag a phurnaa a hlawdawk sumhai chun ka lekha inchuk chu ka sunzawm a. Hi kum hin kei chu kum 20 kan ta a, ka sangpa chu kum 17 a ni tah.

Ni khat chu lekha ka room ah ka tiem laiin ka room-mate nu chun “ Thingthlangmi pakhatin tuol ah khun a zawng che” a hung ti a. “ Tum chuongang mi hmu nuom ding chu?” Tuol ka suok a, hla raklo a chun ka sangpa chu Cement le rawngin a tuom vel thuomhnaw inbel a inthuom chu ka hei hmu a, a kuom chu ka pan tah a. Ka sangpa kuom ah chun “Ienglei a ka sangpa I nih ti I hril naw am a na?” ti’n kan dawn a ama chun innui hieuin “Kan langdan hi en ta la…I sang ka nih ti ka hril chun iengtin am an ngai ding che? An in nuisaw naw ding che a ni?” ti’n a mi dawn a. Ka lungril a tawk em em a, mithli bieng ah a tla a. Ka sangpa zakuo chu ka ben fai vel a. Ka hnuk mi ul rak, tawngtha theilo chun “ Mihaiin iengtin am an mi ngai ti ka pawisa nawh. Ka sangpa I ni a, inlangdanin iengkhawm danglamna a nei nawh” ti’n kan zawt a. Ka sangpa chun a mansa a inthawkin pengpelep lim a mawitak a siem bakkil chu hung kei dawkin “Nunghak po-poin hi hi an nei vawnga, nang khawmin dit ve I tih ka ti leia a thak a hung ka nih” ti’n chu thil chu a mi hung pek a. Ka sangpa chu khanglai khan kum 20 an ta a kei ruokchu kum 23 ka nit ah.

Pasal ka hung neia khawpui ah umin, vawitamtak ka sunghai chu ka pasalin khawpui ah hung insawn dingin ngen sienlakhawm “Hi hin ka um hi keini chun inhawi kan ti nih” ti’n chuchu ka sangpa thutlukna khawm a nih. Ka sangpa khawm chu a sinthawna ah a hung kai sang a, kan kuom ah um a, kan business thawna ah mi enkawlpuitu ni dingin kan ngen khawm chu a nuom naw a. “Uu, nangin I pasal le I tarpuhai thatakin enkawl lem rawh, keini chu kan buoi ve ta nawh” a ti a.
Ni khat chu ka sangpa’n a ke a suk pal leiin Hospital ah ka pasal leh kan va kan a. Ka sangpa kuom ah “Ka thu awila chu hieng anga insukpalna hi I nei naw ding ana” ka ti pek leh ama’n “ kei lekha kan chuk sang naw a, I thil hril kha lo pawm lang in business thaw chu ka suk hlawtling zo naw ding a nih ti ka hriet annawm” a ti a. “kei a lei a inchuk sang lo I ni kha teh” ti’n ka dawn a, ka pasal leh kan mitthli a tla hiel a. “Iengdinga hun liemta hnunghai I hril am ana” ti’n ka sangpa chun ka kut a hung chel a. Hienglai hin kei chu kum 29 ka ni t a a, ka sangpa chu kum 26 a ni tah.

Ka sangpa chu kum 30 a ni’n kan veng tlangram a mi chu nuhmeiin a nei a. A nuhmei neina ah chun “Tu am khawvel ah I ngaisang takin I hmangai tak a?” ti’n zawna an siem a. Ama chun ngaituo hranpa tul ta lovin “Ka U” ti’n. Hieng hin a thu hril chu a sunzawm pei a, “ Primary School ah kan kai laiin kan School fe na chu darkar hni lam zet a ni a, ka phingtam leiin ka lawn zo ta naw a, ka U khawm a phingtam ve bawk ding, ama’n ka in tlung rakin a mi puok tlunga, in kan tlungin a phingtam sawl talo leiin a damnaw zui nghal a, kha ni a inthawkin ka U chu ka damsungin hmangai tang ka tih ti kan tiem a nih’ ti’n a hril a. Mipuiin kut an ben sup sup lai a U nu chu a mi suktap nawk tah a.
A tawp tah!

(Henry Lk 14-06-2013)

FATHER'S DAY(?)

Nuhai hi an ropui a, iengkim an rimna po po le harsatna tuortu an ni a, thi le hring kar ah natak tuorin an min hring a nih. Insung ah a lu tak changphak lovin an um a, amiruokchu insung harsatna khawm hi Pa nekin a tuor lem ti dingin entirna ding tam tak a um.

Pa hai nawk thung chu insung mawphurna lientak an nei seng a, chuchu an sin a ni ang hrimin insung ah chu a thuneitu tak an nih. Pasal hi chu in suk pa nuom ei ni ang hrimim thuneina hi dit em em ei nih, nei khawm ei nei el. Nuhmei hi hnam then then a lem chu an sie hnuoi nasa si a, hmangruo pakhat angela an ngai mei mei chau am a nih ti dingin a um. Harsatna po po tuorlemtu an ni a, amiruokchu thuneina a le khawtlang a ei endan ruokchu khuuuuu an nawk dai a nih. Ei kristienna khawmin chuchu a tleng chuong nawh, Pastor, Rev. etc. an mi theinaw angin ei ngaia, pulpit khawm hi an sir meu ngai nawh amiruokchu thlarau tieng hin pasal neka hrat lem an ni ve tlat.

Chuongang chu NU ngirhmun a ni leiin an chan ei hriet thiem, ei inza in entirna'n MOTHER DAY ei hmang hi chu a phu hlie hlie laiin pasal rorelna khawl cheltuhaiin mi thilthaw phawt lo hmangtum ni angdeu a ei lo hmang hi chu tul ka ti hran nawh ie.

Pa chu insung neitu, thu neitu, power hlak a nei, nuhmei ruokchu a insung maksan ngat a inpe a la ni nawk. Father(s) day an tan dan chu ka hriet nawh, amiruokchu ka ngaidanin nuhai puol bika ni an nei hi a special a, pahaiin ei ni khawm nei ve ei tiu ti a ei nei ve el a ni chun nuhai ni khawm hi ei sukda ni'n ka hriet, pahai an ropui nawh ti na nilovin.

MK Gandhi b'day le mi tlawmte b'day hi ei ramin ei inser a, a hlu. Mi tamtak b'day inser inla chu hlu teu naw nih. Nuhaiin special day an nei hi an phu a, pahai khawma ei lo neive pei ruok hi chu umzie a um ka ti mawh, western culture a inthawka ei hung inchukdawk nisienlakhawm.

(Henry Lk, 16-06-2013)

Ka thi ve pha kei khawm chu chun la hang chawl veng ka ta…

          Khawlai thlirna tukver a inthawk khawmin thlir inla naupanglai hringnun chu a mawi a, thei nisien mitin in kokir nuom seng ei tih. Kan rethei leiin ka nu le pa’n lo ah an mi fesan hlak a, ka u leh School ah kan pahni’n fe in ka u a hnung ka zui hlak. School ṭin ah buṭhing tam raklo a um chu ka U in ama tlawmte chau a fak a, kei khawp naw rawi ka tih a ti leiin kei a tleng ah a tam lem chu a hung thur zie. Ka U in a mi lunginsiet lei a ami pek rawn lem a nih ti na chang khawm ka lo hriet ngai naw a, ka la naupang em lei ning a tih. Ka U chu a ruolhai le inhnel a nuomin kei anni lai ka thang thei naw ding ti a hriet a, “nang lo um rawh uo” a mi ti pek chang ka ṭap pek a, “Nu nu le pa pa an hung pha pha an kuom ah ka hril ding che nih” ka ti pek chang, anni a ti lei khawm ni kher nawng a tih a mi lunginsiet lei kha ning a ta, a fena ta phawt ah a mi ṭhuoi hlak a. Ka u nek a upa lemhaiin “Sanghar ka hmu” ti a an tlan hmang lai khawmin ka u chun ti sa sa pumin mi tlansan nuom lovin puok pumin a mi tlanpui hlak a, ṭi ve hle lang khawm ka u ka kuo de thlat leiin ka thla a muong hle hlie hlie hlak. Kan veng mawng tieng theikuongchawm ra ṭha deu a um a, amiruokchu a ler ah kan lawn thei naw leiin hnuoia a ṭil kha kan rut hlak a ni a, a hmun an khaw em leiin ka U in a bul hnuoi ah a mi lo in ṭhungtirin, a ra ṭha ṭha a ruthai chu kei a mi pek hlak, ama chun a ṭha rak nawhai chu a fak lem a.

        Ka nu le pa’n lo a inthawka fanghma tuoite an hung hawnhai khawm ama’n a ṭha tha chu “hi hi chu ka sang ta ding” ti’n a mi pek hlak a, ama’n a chang naw chang khawmin “a lu tieng chite mi khawi met rawh uo” a ti'n, sei deu el chu kei a mi pek zie. Zan ah ka U'n a mi riekpui hlak a, a imu suok sa sa khawmin tienami kan hriltir hlak a, Mauruong chanchin lem chu ka ngainuom thei leiin zantin a nghawksa sa in a mi hril pek sa zie hlak, asanchu “U, Mauruonghai chanchin hril nawk ta rawh “ ti a ka ngen hlak leiin. “ Khi va mazu te khi panchawn a be lei lei, kap ding maw, kap naw ding maw…? Phung!” ti’n puonlu kan khum a, kan imu a suok deu chang chu ka U in mi kuo tut tut a kan in bawr bawr hlak kha ana. Zingkar School ah kan fe pha ka U in ka lekhahai a mi pai pek hlak a, kei chu hmawl pakhat chawiin lampui a pengpelep vuonghai chu vuo tumin ka hnawt duoi duoi hlak. School a kan hotuhaiin byheart dinga an mi pekhai lampui ah a min dawn hlak a, a chenve chau dam hril pekin ka tlan rak a, mi hung hnawtin a mi lan hrilzo tir tho tho hlak, kan hotuhaiin an mi hrem ding chu a phal naw lei ni ngei hlak a tih.

          Vawikhat summer chawl lai ka nu le pa’n, i U a damnaw nih an ti a, zan ah ka in bawr bawr a. A zing ah chun kan in ah mi an inkhawm a, ka u teh ti ‘n ka nu le pa an tap ngai ngawi lai kan dawn chu tuchen hin ka mithla’n a lan lang ran a nih. Mi hmangai ngawi ngawitu ka U khan dam sunga inhmu nawk ni umta lo dingin a mi lo zamsan ding kha ka lo ring thei ngai naw reng reng kha a ni a aw…!

“Vana arasi eng sing sieu ei Lal lukhum ding chu,
 ka thi ve pha kei khawm chu chun la hang chawl veng ka ta”; chu ngei a chun ka u mi hmangai ngawi ngawitu kha hmu nawk ka tih.

A tawp tah!

Lung a min len!

    Kan nu in a mi thisan na chu kum li vel zet a liem tah a sienkhawm ka lungril ah chu mitkhapkar khat khawm a thi ngai nawh. Kan nunhluihai ngaituona’n hun le nihai chu ka hmang hlak a, Pathienin ka hmangai ngawi ngawi, damlai ni a inhmu nawk ni um ta lo dinga a mi hang lakpek el dam chu mihriem ngaituona chun thiem kan chang thei naw chang a tam khawp el.  Ka hmangai ngawi ngawi ka nuhmei mi petu chu Pathien a ni a, Ama ngei chun iengkim hi asan uma a ruot a nih ti ring thlat tu ka ni leiin iengkim ka chunga tlung chu lungawitaka pawm chu ka thil thaw ding hrim a nih.
     Nau nuhmei Pathienin ril a ra a mi pek a, chu naute chu a nu thlektu dinga ruot ni ngei a ta, a nu chu doctor in a theitawp a suo hnung khawmin a dam zo ta naw a. Tapna ding san rapthlak tak ka tuok laiin lawmna ding san khawm naute pekin ka um a, tap ding am innui ding am khawm ka hriet naw hiel a nih.
     Kum li hnung ah zantieng vawikhat chu ka naute nu leh kan par huon ah parhai tui pein, ka naute nu chu ka lawm vel a. Hi kan par huon hi kan nu le kan siem a ni a, sul hnung dam hmu ding a um leh thawk le khatin nunlui dam a min ngaituotir a. Ka naute nu le kan uite chu kan par huon lai chun inhnelin an tlan kuol vel a. Kei chun ka en zing a, a nu thangsa sienla inhawi kan ti ding dam ka suongtuo hiel a.  Ka ngaituona ah chun nuhlui ram ah dam a mi thuoikir a,  kan nu ka hmangaina khan insirna ka neinaw zie dam le kan inzui a inthawk a ka lungril hmangaina’n “mi I hmangai chun nunhnlui I ngaituo chang khawma insir ngailo dingin hmangai ngaw ngawi el rawh asanchu hi khawvel hringna hi a um sawng ding a ni naw a, ama annawleh nangin vawikhat chu damsunga inhmu nawk ni um ta lo dingin in maksan ni a lan hersuok ngei ding a nih” ti hi ka hriet  thlat a, iengtik hun ah khawm inzam san tuo thei a nih, hringna hi kan ta a ni si naw a ti ka hriet leiin ka lungril inthuktakin chuchu hre zinga ka hmangai ngawi ngawi hlak a ni leiin kan sir naw hle. Chuonga kan ngaituo lai chun ka naute nu’n,  “papa” a hung ti le inruolin pengpelep,  huon a parzu tlanhai chu man tum si lovin kan hnawt vel a.

A Little piece of heaven!

"Life is too short. If u have to say something say it now
for you never know when u would breathe your last."

   There was a time when I fell in love, and a time that I fell out of love like everybody else does, at least most of us. But this love thing has taught me enough lessons in my life; sweet and bitter, hope and despair, laughter and tears.

   After sometime in my life, I  realized I have wasted so many years of my life trying to be who, I don't know.. probably a James Bond...(an ta naw ie)! It didn't really work for me, instead I have ruined my life. And all I ever feel is regret but can't help either because it is my past and things that had already passed is something that even God could not change.

 Let's go straight to the point...

  About three years ago, I happened to meet this girl. At first, I thought of just having a fling with her but then a few days with her changed my perception towards life. She became a change in my life and now she has become my inspiration, my life and a pillar of my strength.

  Why am I so proud of her?

   She's a God fearing person. She reads Bible every time before she goes to sleep and trust in God alone. She would often ask God to be a witness to our relationship. She doesn't indulge in drinking, smoking or any tobacco related habits. In all she is my true angel. No!!! she doesn't have superpowers yet she makes life easy for me by her enduring trust and love for me. However, its her simplicity that makes me head over heels over her and that's what I love most about my girl.

Want to know why she is even more special???

  Okay! She knows everything about me both good and unpleasant, she doesn't bother if I were rich or poor, she accepted me with my past and she never make me feel inferior. She is richer and much more educated than me yet she never tries to overshadow me because of my in-capabilities or ignorance. She is such a person whom every girl should try to look upon. She is a complete package of gratitude, humility and affection. Huh...let's stop here!

  Oh yes!  The feeling that she gives and the dreams that she has shown, these happenings with me is really a little piece of heaven. I love you!

PS- This story is just a fictitious fragment of my imagination and not meant for showing off at all.

A fair nawh!

      Nuhmei a ka pieng hi kan sir chang a tam nuom khawp el. Ngaizawng thu a le nuhmei pasal insuksiet thu amanih, annawleh nupa inthena thu a khawmin nuhmeihai ka'n chan hi fair nawh ka ti thei khawp el a, amiruokchu khawvel fedan a ni a, nuom thu a siemthat thei el thei ding a ni nawh. Hun le ni la hung inher liem pei a ding ruok chun thawsuol angkhat si chun hremna am a nih hmingsietnahai khawm in angrawng sienla nuom a um khawp el.
   Pasalhai hi suol ka hung ti deu deu a, an zerhuom kai rakin an hmangaina thu an min hlan a, mi lungril tak hlak chu ei hmu thei naw leiin a tak tak ngei chu a ni ta awm hi ti'n an zun ah ka (kan) lo thlu nawk hlak a, beiseina hlimum em emhai an mi'n hmutir chang a bo nawh, ei hringna nek chen khawmin ei hung ngaisak a, ei nei po inro lovin an ta dingin ei phal hnung ah, andittak an hmu ta lei ni ngei a ta, an mi ngaitha a, a tawp ah lem chu mi dang an mi belsan nawk el. Ei lungnat an hriet khawmin ieng ah an mi ngaipek ta naw a, insumzolo a mithli tla hai chu an ta dingin ningtelna chau dam a ni mei mei tah. Amiruokchu a chanchin nakie le ka la hung hril ding pa ruokchu hieng ang mi hi a ni ve naw a, pasalhai po po chunga ka ngaidan le hmudan tha naw hai mi tlek danglam pektu a ni lem.
     Awleh, kan unau mi pahni chau kan ni a, mi angin hausa naw inlangkhawm chantawk ah chu indu lal ve thei tho kan nih. Nu le pa'n an mi duot a, ka dit dit ka nei thei leiin ruolhai inhnar khawm ka hlaw el. High school ka hung kai ve a, kei le kei kan pakna thu nilovin mi'n hmeltha ti'n an mi sawisak vet hlak. Darthlalang ah kan en chang khawm ka lung a awi hlie hlie'n kan hriet. Tlangvaltehai a hmeltha deu ti a ka zuk mel zawt chang khawm ka en hma dai a milo en tawl dai an lo ni hlak a, chuchun mi ditum ka nizie chu hriettheina chin ka nei. Chuongchun ka hrietnaw kar chun damte'n pasal ditna lungril ka lo nei a ni ta zing a, ruolhai khawm ngaizawng nei dam an um nuol ta leiin mak kan ti hranpa chuong nawh.

    Ngaizawng ka hung nei tan a, inhawi ka ti chang khawm a tam khawp el. Nu le pa kuomah thukhel hril zeu zeu dam a hung tul chang a um ta a, insung nek a tuollai ngainatna dam a hung intan a, a kar changlem chu khawpui a inchuk a zalen tak a um nuomna dam ka hung nei a. Inchei khawm a hma nekin ka hung inhnik let tam ta bawk, ka fesuol deu an ta ti hrie lang khawm khawvel dan reng a nih,  ti’n kei le kei kan thiem fawm el a.

   Chuongchun ngaizawnghai lak a chu tulai tawng tak a dingin ka LER vieu khawm ning a tih, ka ngaizawng then thenhaiin mi dang le kan inbiek am a ni, annawleh function/public gathering a mi dang le kan lo thungkawp lei dam mei mei chun an min sel pui a, anni chau tlangval nilo hai a ti’n “I nuom le mi the rawh” ti’n ka dawn fawk hlak.  Ka EGO lei lieu lieu a ni tlangpui , ka tleirawl ngaizawnghai le kan in the nasan tak hai chu.

    Ka lo beisei ang hrimin pawl sawmpahni ka zo chun, khawpui a sunzawm dingin ka nu le pa chu ka suoksan ta a, nu le pa mi hmunaw a um nana na chu veng ding an vang a, var tak a um a, mani thawding hrietnaw chun  boralna thei tawpa zalen ei nih.

   Kei a anga ler,  tlangval khawm an lo tam ta khawp el khawpui a chu. Ngaizawng hung neiin, nunghak lai a nupa nun hmangna  chu ieng a khawm ngailona chen dam ka hung nei ta a, chuongchun ka hlutna tak chen khawm mi kawl ah ka lo inhlan el an tah, Lalpa mi ngaidam rawh!  Suol ka lo ti hai kha ienga khawm ngainawna ka hung nei deu deu a, a kar chang ka ngaizawng pa kuom ah va riekin annawleh a remchang phat ama a hung riek a. Suol a chu ka lo thlulut inthuk ta khawp el! Ngaizawnghai le inhriet thiemnawin ei hung inthe a, sawtnawte ah a thar ei hung nei nawk a, hringnun hmangdan kha chu a pangai tho.

    Mi’n an mi dem chang an hril ding a um nawh, ti’n mi midemna hai chun ka lung ka suksen a, ka thil thawsuolhai ruokchu ka hmu tum naw reng reng. Kan chukna khawm zo theiloin ka um pha a, a tawp ah chu vengtieng bawk a kirnawk kha lampui umsun chu a hung ni el ta si, ka ngaizawnghai hlak nuhmei an la nei nuom naw lei am a nih, annawleh nei ding en a an mi en naw? Ka hriet thiem bik nawh.

    Vengtieng kirin kan khuo college umsun ah, admission ka lak tha a. Tuhin chu puitling thawkkhat ah kan ngai ta a, var deuin  ka thawding thaw ka ta, ngaizawng khawm fimkhur tang ka tih ka ti a. Tlangval mi beiseitu thar an hung um nawk a, ka chanchinhai an hriet naw a, zuk inzui pui el chu thiltha dingin ka ngai thei naw a, an hril nasa si a, ringzo ding hlie hliein a um leiin ka thienghlim ta naw nih, tihai chen ka hril a, ama chun nunhluihai ah iengkhawm  buoi naw rawh ti’n a mi thlamuonga, a mi ngaidam ni a ka hriet leiin ka lawm hle.  Pasal hi chu aw anzie an thup thiem hle ning a tih, pasal ding en in ka hung en ta a, ama khawmin a ta angin a mi en ni’n ka hriet a. A mi nei ding khawm nilohai kuom ah hman khang khan ka um a, a mi nei nuomtu chung a chun iem kan ro ding, ti’n ka nuhmei varna chun varal a lo kai naw ngei chu a ni hi, a mi hnita phawt le a nuom dan ang phawt chun ka taksa chen khawm ka lo phal nawk ta a. Hun tawite hnung ah a mi ngaidan hai a hung danglam ta a, kum chenve zo ah chu kan hung in the nawk el tah. Hi chau hi nilovin chuong angbawkin pakhat le khawm hun sawtnawte kan lo inzui nawk hman a, lungsen deuin a mi liemsan nawk  ti naw chu kan hanchin hril el khawm ka hril pei nawh. Ka var thei naw tak tak chu a ni hi!

     Pasalhai mizie hlak hi a mak, an rengin an ni naw khawmin a tamlem dai chu ni hrim hrim an tih. Nuhmei hai kuom ah inpha hnuoiin, a sur a sa, a dei a lum dawn lovin nuhmeihai an par thlan theina ding a ni phawt chun iengkim thaw an inzuom vawng . Nuhmeihai kuom ah chu naute angelin an insek a, thil suksuol thei lo ding angelin an inhril chang hlak bo lo. An beisei tak an hmu pha, an ruolhai lai intitheina damin an hmang a, chuchu an holim nuom zawngna a ni tlangpui si. A nuhmeinu’n a nghawk taluo lei a, suk lungsen ding le suknuor zie kha a nuom naw a, kha thil kha anhlan el a ni ti ngaituona chang khawm an hriet nawh.  A nuhmeinu’n a muolphona chen khawm inhuom a, a neisun an hlan el  a ni ti ngaituona chang lem chu an hriet der nawh, a bil a thawlo an tihai kha chu an nihai ngei hi an ni hmel!

     Kei le kei kan ngaisie a, mi po po ku hin an mi endan khawm hi a mak vawng ni’n ka hriet a, kan ngaibel lei khawm ning a tih. Pasal reng reng chu a en khawm ka en pei ta naw ti inla khel hril chu ni nawng ka tih.  Ka khat a kan ngaituo chang ka nu le pa’n Pathienthu ah an min chuktirnahai kha lampui indiktak a ni lem ding a nih ti’n ka ta dingin Pathien bel chu a tha nih, ti chu ka thu suk thlukna a nilem ta a.

    Mi’n an mi hmusit nia kan hrietna lei khawm ning a ta, ka hmelthatna khawm hrietfuk a ni ta nawh. Amiruokchu ka nu le ka pa’n ka hmeltha zie chu an mi lan pak zie a, mi’n an mi hmusit khawmin ka nu le pa ruok chun an mi hmangai a, beiseina tamtak ka chung ah an nei ti ka ngaituo chang le khawvel ta dingin nuizat um in, ka hmel thatna’n umzie neinaw sienkhawm ka nu le pa ta ding ruokchun  ka nek a hmeltha le fel an um nawh ti ka hrietin, ka lawm a, lungril a tawk el khel ah, lungriem mithli chen a thla naw thei nawh. Nu, pa, ka lawm taluo!  Nu le pa hmangina hi chu aw a thlukpui dingawm hmangaina hi khawvel ah a um nawh.
To be contd...

Chibai mangṭha, chibai mangṭha

            Mikhuol chu intinin in keng naw deu thawin kan nei a, a chawngpuhai ding chun ieng dang ngaituona ding an kuo nawh. Kan mikhuolhai hi inhawi ti nawng an tih, an riekna ding ah an lung a awi ding am, ei bu le hme an fak thei dîm, ti naw chu ngaituo ding dang a um nawh. Keini tlangvaltehai ta ding ruokchun chuong anga buoina chun a mi lo hip phak ve naw a ni deu tak. Mikhuol hunghai chu lo thlirin, an inchei dan dam enin kan inhnar ruk a, a ṭhen nunghak le tlangval hmelṭha deu intlawnhai chu kan thikrûk rieu bawk.

Inkhawmpui laia a khuo miha’n hlapawl an sakna a ṭhang kha chu makmaw a kan ngai a, kha kha tlangval kan ni ta ngei kan inhrietna ni’n kan ngai si a. Rawl lan pui bek bek naw sienkhawm thum dur a sak ve ni awm takin kan lu kan suk zau zau.  Khuo dang dangin hlapawl an sakhai chu thiem kan ti thei hle a. Nunghak hmelṭha ti zawng deu  a hma tlar ah an la ngir nawk lem chun tu mi hrietpui lo in ei lo dit rûk thei, mitthla ah an châm a, duthu dam sâmin, ngaituona an suk sei fêt.

          A nikhat ni a hung bo a, mikhuolhai chu nel deuin kan hriet a, amiruokchu an kawla bufak chu ei la ving zut tho.  School chawl lai a hi inkhawmpui hi um a ni bawk leiin hi NU a zûn ah nakie pha ka lo intui el ding khawm hin a U le a nu a hung zui ve a nih. Kan in kher kher ah a la tlung nawk. Ngaizawng chu la thaw ngam chie naw inla khawm nunghak/tlangval inditna lungril chu kan hung nei ve met met ni tâng a tih, a kar leh tu hriet loin kan in en tuo a. Vawikhat in entuo khawm khan mood a suk fuk hle. Inkhawm dinga a hang inchei kha chu hmelṭha ka va hang ti lawm lawm de aw, hrilfie thiem lang ka ti ngawt el. A biengsum an nuisat changa hung inlang chu um naw sienkhawm a nal tho tho vai leh, demna ding awm ka hriet nawh. Naupang thu awi tak, to rieu rieu hai angin a tawng tlawm a, a ṭawngsuok pha le a rawl  chu mawi ka va hang ti lawm lawm de aw…lungsen ngawi ngawi châng khawm kha rawl khan mi hang tlem sien chu lungsen a inhrosa chu um naw reng reng a tih.

         Pathienni zan chu kan inkhawmpui a tawpna tak zan a ni ta leiin  tin dingin hla kan sak a “Chibai mangṭha, chibai mangṭha” ti’n.  Kan mikhuolnu khawm chun zing khawvar ah a mi liemsan ding a ni ta a,  kan biekin kan um bur bur khawm chu mi tlawmte chauin inthawl rem rumin kan pan ṭawk ṭawk nawk ding an ta bawk. Kan insunghai lum lal lala mi bawmtu um ta lovin ruok rawng rawngin, arkhuong ri chau naw chu hriet ding aum ta naw ding an ta ti ka ngaituoin khuo a lo sawt lawk a. Inkhawmpui hlak  chu chel sawng thei kan ni si nawh…. Kan hlasak chun khuo a lo suk sawt lawk a, inzak ding um naw sien chu mithli le insawp el a sak ka nuom hiel a nih.

        A zing ah chun mikhuolhai phur dinga an motor riruong senghai chu a hung a, chuongchun a tiem in an liem a, hmun khat a inthawkin an motorhai chu ka hei thlir zing a, an langphakna chen chu nghawk loin ka thlir  a. Sawt naw te a chun mikhuol po po chun an mi zamsan ta vawng a.  Ka iengthaw nuomna khawm a um naw leiin khuosawt takin ka bawk a, ka lo sawl deu khawm ning a ta, a tawp ah, ka in ta a.

Krismas nang leh

    Ka mit a chau ta a, ka ri hriet theina ka na khawm set tieng a pan tiel tiel. Ka samhai a tuoi zo tah. ka vun tawmhai chun ka tar zie le thi chau an tah ka hmabak ti an min hriet tir a. Lungril puitling em em a ka loin ngai hlak khawm chu a lo inthleng ni tang a tih, naupang te ang elin nuor ka ching tlat. Ka nau, mo, tu le te hai leh umna hmun khata cheng si’n kan khawvel ruokchu a danglam hle, an ngai nuom zawnghai le an hmu nuom zawnghai chu ka ning sukteltu dam chau an nih, hril nuom hai an ang nawin, ka mimal ringawt ni’n kan hriet chang a tam.

    Sun hun  hung tawi tiel tielin, zan hun a hung sawt deu deu a, zingkar daidaw de fur fur hai le thing hring ha’n an parmawina hai le an rim inhnikna hai a bo zo an tah ti hrie ni awm takin fur phat a in tuoi thar nawk lem di’n an chengna kung a inthawk an til tla diem diem a. Ka chau ta em leiin biekin tak ngiel khawm ka pan zo ta nawh. Biekin a thalai pawlhai hlasak le lengkhawm hla an sakhai ruokchu chieng takin hre naw lang khawm, inhawi an ti dingzie ruokchu ka ngaituona mit-in ka hmu. “Krismas dar in lung a min len” ti hla an sak chun,a dar ri la hre chie naw lang khawm lung a suk lengin Lal piengni champha chu a tlung el ding an tah ti a mi hril.

    Vawikhat chu ruol hai IN a ka leng a,kan in nui bur bur lai, ka naupa in hmaw em em a hung tlan chu tukver an thawk ka hei hmu a, in-leng kan nei leia mi ko dinga hung ni dingin ka hei ring nghal a. A nu khawmuol hre loin a tlu ti a mi hril le in ruolin in tieng ka tlan phei nghal a, chuongchun sawttak kan hmet vel hnung chun a hung har thei nawk hram a, hun sawtnawte hnungin hospital-ah kan van en a, doctor han hmun lien lem a in enkawl ding an mi ti chun ka ngai a tha naw hle.

   Chuongchun leh, hmunpui doctor kan pan a, kan nu damsawt ta naw ding zie an mi hril a, ka hnuk in a mi ul a, ka mittli thlak ding ruok chu kan veng hram hram. Lungngai lo ding le a dam nawk el ding thu hai hril lang khawm, ka rawl a chun tlaphangna a um a nih ti chu kan nu’n a hriet el khel a, ka duot let tama ka duot chun thil chu a pangai an naw ti chu a hriet thei nghal a. A nunghak lai ni khat meu khawm a thang loa hun ka hmang thei naw ni hai, kha lungril ngei kha a hung in lum let nawk a. A hmel ka en in ka lunginsiet a, kei kan ngaituo in kei le kei kan lunginsiet em em bawk. Kan fiemthaw hai khawm kan in nui sawt nawh, ṭapna’n a mi zui nawk el lem si. Chuonga kan beidawng em em lai chun, khawvel ruok chu Lal Krista pieng ni champha lawm dingin an in su hnawk hnawk a. Lung an suk muong hle niin ka hriet.

    Kan naupa kumhni mi a ni vel chau laia kan Krismas hmang ka la theinghil thei nawh, kan nu ding thuomhnaw kan in chawk teu khel a, kan naupa ding tam tak thil thar kan lak pek a, kan u le nau hai ding khawm thilpek (gift) kan pek teu a, thuomhnaw thar mawi tak le Krismas nipui ni a thu ka hril ni kha chu KRISMAS in umzie a nei hle. Turuok hin chu ngaituona’n kil tin kil tang a hrut vel a, Mi a nu/pa chân hai ta dingin krismas hi iem a ni ding o..! An naupa/naunu chanhai sungkuo ta ding in krismas hi iem ning ata?? kan nu ta ding hin teh iem a ni ve ding aw….!! kei a ta ding khawmin iem ani ve ding leh…..!!

Kan nu hi khawpui a lekha inchuk a ni leiin Krismas chau hi kan inhmuna hun um sun chu a nih. Ka ngaithei hle leiin lekha ka thawn inzing thei hle. Ka nuor chang mi tlem a thiem hle a, a mi duot bawk leiin a kuoma um chu inhawi ka ti thei hle a nih. Ka Arasi ka damsunga var chu ama ngei hi a nih ti kan hmai nawh, muol milo liemsan ding nisien khawm ka lungril inthuk taka chu var tawp thei ngai naw nih. Kum tamtak liem ta hnunga kan nu tawngbau ka theinghil thei naw; “Tlasik hung ni nawk a ta chu a chun ei lan hmu nawk ding an nawm ie” ti’n a mi ngaizie hai lekha’n a mi hung thawn hlak a, a vel velin ka tiem hlak. Krimas hun a hin chu inhawi kan ti thei hle a, ruolhai khawmin min hnar thei hleng an tih. Ka phu lo Pathienin ngaizawng hmeltha le fel em em a mi pek leiin a kuoma lawmthu ka hril mawl mawl hlak.

    A natna in inkiengzai a rel thei ta nawh a. In ngai man a inchel sawng thei ding khawm kan ni ta bawk nawh ti ka’n hriet!! December 25th,1996 zingkar ka thoin tukver ka hawnga, nisa chu a lo insang ta hle. Kan nu hmel ka zuk en leh, a lo thang dai tah a, imu inhnik taka ka in chu a mi chawkbuoi pei naw leia mi kei tho lo a nih ti  ka hriet. Thlai ka suong vat vat a, tui kan lum a, kan nu chu tuilum chun puonte hmangin a panghai ka nawt fai peka, a thuomhnaw thatak chu kan beltir bawka, kei le ka naupa khawm chu insil faiin kan thuomhnaw tha hai kan in bel a, ka’n zo charin kan zalna pindan chu kan naupa le kan pan a, sung inkhawm nei ding kan nih. Kan nu Bible chang thlang ngei chu ka tiem a, “Ṭi naw unla, ngai ro, mi tin ta ding chanchin tha lawmum bêk bêk ka hung intlun cheu a nih. Vawisun hin in ta dingin Davida khuoa Sandamtu a pieng tah……..” !! Kan nu lo huoisen dan hi mak ka ti khawp el, ka mitthli a tla a, kan nu ruok chu ka en ngam nawh, ka mitthli tlak a hmu ding ka nuom ngai nawh, ka tap nuom naw leiin thil dang dai ka hril hlem nawk a, kan nu hin ami zamsan hnung khawma hlim dingin a mi dit a, a Bible chang thlang khawm chu ropui ka ti hle. Keini sungkuo thina ko tlanga ngir, ka nuhmei ka duot ngawi ngawi zuk boral el thei ding ngirhmuna ngir, chuhai sungkuo ta ding khawma CHANCHIN LAWM UM BEK BEK chu Lal Krista hung pieng ngei hi ani zie ka’n nu chun a lo hmu chieng hle a, chu ngei chu a mi lo hril nuom a nih, ti chu kan hmai nawh. Kan sum zo lul naw leiin ka bienga mitthli chu ka hruk mawl mawl a, kan nu chu ka en ngawm nawh, a bienga mitthli far tuk tuk chun ami suk tap deu deu ding a nih ti ka hriet a. Hla kan saknawna a sawt tah, hlasak lengkhawm hai a khawm kan thang theinaw ding a ni ti kan in hriet bawk. Thei le thei loin hla kan hang sak a, a thunawn, “Tapna ram lungngaina khawvel ka cheng laiin lungruolna Zion tlang chunga ei lengkar ka nghak hla”, kan sak zawm thei ta nawh.

       Kan nu a khata a fe ding chu ka phal thei lul nawh, tlan hmunkhata zal a lungruolna Zion khawpui a hlim taka kan leng khawm ding chu a let tamin ka tlang lem si a. Thi chu nuom hle lang khawm ka thu a ni si nawh. Kan nu’n keiin tawngtaina chu nei ka tih a ti leiin khum a chun ka kai a, kan naupa le kan lu chunga a kut in nghatin “Aw Lalpa, ka pasal le ka naupa hi ka va hang zamsan ngam naw de aw! Ka ngai ngawi ngawi a nih ti i hriet ie, Pa. I remruotna chu sel thei ding ka ni si nawh. Ka zamsan hnunga nangin i enkawl ding a nih ti ka hriet leiin ka thla a muong em em el a nih. Pa, vawisun ruok hin chu kan khawvel khawsawtna le beidawngna hai mi la kieng pek la CHANCHINTHA LAWM UM BEK BEK HI hi insunga intlun ta ang hrimin lawm taka chu chanchintha chu kan lo dawng ve theina dingin kan lungril mi hung sawi danglam pek rawh”, ti’n.

Ka miththli tlak zing hi a nuom ta naw a, hrat dingin a mi dit a nih ti chu ka hriet tah. Insuk pasal a naute hlim tak a chibai buk chu thalem ding ni’n ka hriet bawk a. Kan nu’n a puon tha tha hai chu a min keidawk tir a, kan Krismas thuomhnaw dinga kan chawk iem a ni zat le chun…(Kan nu hriet zingna dinga hi Krismas hi kum dang naw angtak a hmang kan tum a nih. Kan sung le kuo hai neka pasie lem tamtak Lal nau lawmna dinga thuomthar tak meu khawm inchaw zo lo an um ti kan hriet si a) tha tak a tuomin Krismas GIFT ti’n ka semvel tawl a, a sunga iem a um ti ruok chu la hre naw hai sienkhawm an lawm hle ti ruok chu ka hriet. A sunga thil um an hmu hnungin lawm nawk zuol an tih ti kan hmai nawh, asanchu kan dit lai ngawi ngawi keini ngei khawma kan la hmang lo thuomhnaw man tam tak tak dam an ni leiin. In ka hung kir a, kan nu hmel chu hlim deuin a lo in nui sieu a, kei khawm ka hlim hle. Kan naupa ruok chu nal taka incheiin biekin a fe di’n a ruol hai a zui a. Chuongchun Krismas chu lungawi takin kan hmang zo tah a.

     A zinga chawhnung dar khat vel in kan nu chun a mi boral san tah a. Zantieng thimbutin a ruong  vuiliem in, zana khawtlangin mithi sunna programme an mi hmangpui a. Kan nu bo a hun le ni ka hmang ding ka zuk hriet suok phat ka hrietnaw kar ka mithli a lo tla nawk hlak. Thalai ha’n hlapawl an hung sak a, a thunawn, “Hla tak a ram mawi a chun, lunghlu kawtkhar mawi tak chu ei ta di’n an hawng mek a nih, rangkachak khawpui mawi a ei lut vak ding, inpak ei tiu hi hnuoi ram mi ei ni nawh” tiin. Lungril a fang khawp el a, tap ding am a nih in nui ding ti khawm ka hriet naw hiel a. Kan nu kuoma fe kar chu ka nghakhla ta em em a, ka mithla’n kan lan hmu nawk hun ding dam ka hmu a, hmu kar ka nghak hla hle. Mi an tin zo hnungin tuol ka suok a, van tieng ka hang en a, ka chunglaizawn taka SIRUK(arasi paruk in kawp thlasik lai a inlang hlak) ka hmu thei, a kawl vela Arasi var tha em em ka hmu a, ka en zinga ama khawma a mi hung en ve ni dingin ka hmu tlat, chu ngei chu kan nu ni dingin ka ringa, van a arasi hai anga varin an thuom lem an tah ti ka hriet a, ka lawm hle. Chuong chun innui sieuin in ka lut a, kan khum a ka naupa chu a lo in bawr bawr a, kei khawm ka zal hadam ta lem a.

    Ka nunhlui liem ta hnung hai ka zuk suikir chu lung a suk len hle, ka hriet naw kar ka mitthli chu a lo tla zung zung a. Kan nu’n a mi maksanna kum tamtak a liem ta ti khawm ka hriet a, kan nu’n, “Tlasik hung ni nawk a ta, chu a chun ei lan hmu nawk ding an nawm ie”, a ti khawm ka theinghil thei nawh. Thlasik chu vel tam tak liemin, hung inher kir nawk hlak sien khawm, kan nu ruok chu a hung kir nawk ta nawh.

A tawp tah!

Kha Naga nu te kha aw!

Kha zantieng kha chu ka mithla ah a la châm zing a, kan In hluonahai an naupa leh suokin INTERNET CAFÉ ah kan fe a, a sung ka zuk lût khawm khan mi tamtak neka changkâng duokin kan hriet a, asanchu computer el khawm la hmu lo mi tamtak ka hriet hlak hai ngei khawm an um ti ka hriet leiin. System pakhat kan zuk lak ṭhuoi a, thawding chu kan hriet naw khawp el…. WWE superstar hai thlalak kan en kuol vel a, kan nghawk deu thaw ta leiin kan suok a, darkar khat kan hmang tlingnaw deu a chu cheng sawmhni panga kan seng a nih. Chuchu internet ka tawk tan na hmasatak a nih, a mouse ruokchu ka lo them hmel ka hriet nawh.

Ruolhai zarin damte’n ka hung hriet met met a, ka ruolpa pakhat lem chu a hostel fee ding bak rak khawpin browsing center ah a sum a hmang hlak a nih. A kawl ah kan thung hlak a, “cam to cam” an limhai in en tuo a, an hang in biek chang lem khan chu ka thik ruk thei rieu khawp el. Tuhin chu leh… ka thiem thawkkhat tah ti’n ka khatin ka fe ve tan a, ruolhai zarin YAHOO ID khawm ka nei tah, khanglai khan chu email address nei ringawt khawm kha uongna khawp a nih.

Ka hril tum tak hril tang ka tih ie;

Ni khat chu Naga nunghak kan chat pui fuk a, “cam 2 cam” a ni bawk, inhawi kan ti ve ve ning a tih, darkar thum vel lai zet  hun kan hmang kawp hiel a. “ASL pliz” ti a ṭan in damte’n kan nuom zawnghai dam kan hung hril a, ama khawm kei a ang bawka internet le chatting chungchang chu la hrie bek bek an nawh ti chu ka hriet theina tam tak a um.  Kan seilienna khuo le kan umna state hming dam hrilin minute sawmthum vel zet chu kan hmang tah a. Kawng chu a kham tan met met, amiruokchu inhawi ka tina’n a mi hne em leiin chuong ang thil chun a mi sukbuoi phak teu teu nawh.

Ngaizawng a nei naw thu dam a hung hril hnung lem khan chu, ngaituona a sei nuom khawp el… Lo in nei ding dam ni inlang chu kan hlim dan ding zie dam ka zuk ngaituo phak hiel a nih(haha). “ In hmu lo in kum nga I ringum hne ding?” ti  a min dawn khan chu, ka dawn inrang khawp el, “aw” ti chau a dawn kha chu kan sit khawp el, “aw, taluo ringawt (yes,definitely yes)”  in hmaw deu khan ka dawn a, ka lungril chun ama dinga ringum a ni phawt chun kum nga nek a tam khawm kan zuom a. A lim(cam) ka en zing a ni leiin an nui var chu ka hmu thei a, ka hlim ve em leiin ka khat khatin kan nui a, mi dangin mi hmu hai sienla chu invet khawm an mi sawn el thei a nih. “Kum nga zo a Innei inla pa I tlingzo chie dim a nih?” ti’n a mi hung indawn nawk a, hun tawite sung nisienlakhawm ka lungril a hne hle lei ni ding a ni a, a ti phawt kha chu kan huom vawng a nih. Ama lei chauin kum nga hnunga chu lekhathiem deu le mi ropui deu ni dingin kei le kei dam ka suongtuona mithla a ka zuk inhmu a, ka hlim em leiin ka pe tat tat zing a.

Chuonga inhawi em em a kan holim chu , hun fe kar khawm kan hriet hman naw a ni deu tak, darkar thum vel zet chu hun kan hmang tah a. Hi ni hi Nilaini zantieng a nih. Inrinni zantieng dar nga char a inhmu nawk lem dingin, ti’n kan in the a. A tu tu khawm hun sukdik ding ti’n. A bill chu ka ringnekin lo tam sienkham pawi ka ti teu teu nawh, chu nek hman hmanin khang anga nunghak tha kan biekpui kha hlawk le lawmum kan ti lem a. Intieng ka kir malam chun sa ka hei inchawk  a, chu zan a ka sa hme chu ka hlim em lei ni ding a ni a, ka sa hme lai popo chu an hnik tak ni dingin ka ring hiel a. Zan ah chun ka lungril ah ama nu chau chu ngaituoin, a kar leh ka khat khatin kan nui a. Inrinni hung tlung ding mawl chu ka nghak hla a.

Inrinni chu a hung thlung ta ngei a leh…. Zantieng kan silfai a, inhnu pal ka tih ti kan lau leiin kan siem vat vat a, dar li le a chenve chun browsing center chu ka thlung ta der a. Ka ngaizie thu dam le ama ka ngaituona lei a nuizat um tak tak a ka umhai dam chu hril kar mawl ka nghak hla a. Dar nga an ri hma chun ka YAHOO MESSENGER chu ka login a. Dar nga a hung inri tah. Leh! Tuzet hin chu ka buoi tah, kan lo hrietnaw lei a friend a khawm in add lo kan ni kha a lo ni zing. Ka bei a dawng khawp el, CHAT ROOM ka zawng thei popo chu ka zawng khawmin, chuonga chu zawng seng an naw ding zie chu ka zawng rawn po leh ka hriet deu deu a. Ka beidawngin ka ruolpa kan dawn hlawl a, amiruokchu thilthei an naw zie a mi hril a. Darkar khat le a chenve vel lungawp kai rak a ka zawng hnung chun ka beiseina popo a tawp tah. Kan thuhrilhai le ka beiseinahai popo boruok a an chang el ding a ni ti ka hriet ta a, pawi ka ti hle. Thawthei iengkhawm ka nei naw leiin zawi dawlin ka room tieng ka pan nawk ta a. Ama khawm kei ang bawkin a mi zawng ding a nih, ti dam ka ngaituo chun lungril an hawi naw hle.

Kha nu khan kha zantieng khan a mi zawng ve dim aw!! Kha ni a kan hun hmang le kan thu hrilhai kha a la hriet ve dim chu! Pasal a nei ta dim aw…!!! “Kum nga chen i ringum hne ding?” ti a , a min dawn kha tu hin chu kum nga a liem dai an tah a.

Khawsawt a um de aw!

#Naupang kan ni lai a tuol lai dunga zalen tak a kan tlan inlawn nihai te kha aw!

#School tin(trin) a ruolhai le theira rut a kan fe lai nihai te dam kha!

#Pathienni tuk a serial en nuom le Sunday school fe hun intuok hlak kha chu vaihai suol ka va ti thei de aw!

#Puhai buchil/butlar lai a, pawl a lo inhnel a, bufak phat a armal hang dawm dam kha chu aw eh!

#Tarzan le Phantom tum an hrat ding ti ka buoipui lai nihai dam te kha!

#Sunghai bazaar-ah an fe chang a Thin arrowroot bei an hung hawn hei fak kha chu aw….. a ki anthawk damte’n ei zuk fak kiem diet diet hlak a na tie!

#Kan venga school hung kai nu kha pasal a nei ta ding am , a ruol nu khawm kha aw!

#Ka ruol pa kha khawpui-ah officer sin a thaw ta a, a hung kir nawk pha pha vadung-ah nga man dingin rusuk  ah a la mi fe pui nuom ding am chu ie eh!

#“Zotlang dingdi” ti hla tape record a play a ruolhai le nunghak kan lenglai nihai te kha, a then ruolhai kha khawlam an um zo ta ding chu!

#Marble inhnel thiem deu ka ruol pa khawm kha nuhmei a nei ta dim chu maw eh!

#Kan thalai a nunghak hlasak thiem ka ti thei em em nu te kha khuo dang-ah an inpem dai a, hla a la sak zing hlak dim chu!

*Hlimlai  nihai khan iengtik lai tak a muol an mi liem san am a ni ding chu maw*