Ka mit a chau ta a, ka ri hriet theina
ka na khawm set tieng a pan tiel tiel. Ka samhai a tuoi zo tah. ka vun
tawmhai chun ka tar zie le thi chau an tah ka hmabak ti an min hriet tir
a. Lungril puitling em em a ka loin ngai hlak khawm chu a lo inthleng
ni tang a tih, naupang te ang elin nuor ka ching tlat. Ka nau, mo, tu le
te hai leh umna hmun khata cheng si’n kan khawvel ruokchu a danglam
hle, an ngai nuom zawnghai le an hmu nuom zawnghai chu ka ning sukteltu
dam chau an nih, hril nuom hai an ang nawin, ka mimal ringawt ni’n kan
hriet chang a tam.
Sun hun hung tawi tiel tielin, zan hun a
hung sawt deu deu a, zingkar daidaw de fur fur hai le thing hring ha’n
an parmawina hai le an rim inhnikna hai a bo zo an tah ti hrie ni awm
takin fur phat a in tuoi thar nawk lem di’n an chengna kung a inthawk an
til tla diem diem a. Ka chau ta em leiin biekin tak ngiel khawm ka pan
zo ta nawh. Biekin a thalai pawlhai hlasak le lengkhawm hla an sakhai
ruokchu chieng takin hre naw lang khawm, inhawi an ti dingzie ruokchu ka
ngaituona mit-in ka hmu. “Krismas dar in lung a min len” ti hla an sak
chun,a dar ri la hre chie naw lang khawm lung a suk lengin Lal piengni
champha chu a tlung el ding an tah ti a mi hril.
Vawikhat chu ruol hai IN a ka leng a,kan
in nui bur bur lai, ka naupa in hmaw em em a hung tlan chu tukver an
thawk ka hei hmu a, in-leng kan nei leia mi ko dinga hung ni dingin ka
hei ring nghal a. A nu khawmuol hre loin a tlu ti a mi hril le in ruolin
in tieng ka tlan phei nghal a, chuongchun sawttak kan hmet vel hnung
chun a hung har thei nawk hram a, hun sawtnawte hnungin hospital-ah kan
van en a, doctor han hmun lien lem a in enkawl ding an mi ti chun ka
ngai a tha naw hle.
Chuongchun leh, hmunpui doctor kan pan
a, kan nu damsawt ta naw ding zie an mi hril a, ka hnuk in a mi ul a, ka
mittli thlak ding ruok chu kan veng hram hram. Lungngai lo ding le a
dam nawk el ding thu hai hril lang khawm, ka rawl a chun tlaphangna a um
a nih ti chu kan nu’n a hriet el khel a, ka duot let tama ka duot chun
thil chu a pangai an naw ti chu a hriet thei nghal a. A nunghak lai ni
khat meu khawm a thang loa hun ka hmang thei naw ni hai, kha lungril
ngei kha a hung in lum let nawk a. A hmel ka en in ka lunginsiet a, kei
kan ngaituo in kei le kei kan lunginsiet em em bawk. Kan fiemthaw hai
khawm kan in nui sawt nawh, ṭapna’n a mi zui nawk el lem si. Chuonga kan
beidawng em em lai chun, khawvel ruok chu Lal Krista pieng ni champha
lawm dingin an in su hnawk hnawk a. Lung an suk muong hle niin ka hriet.
Kan naupa kumhni mi a ni vel chau laia
kan Krismas hmang ka la theinghil thei nawh, kan nu ding thuomhnaw kan
in chawk teu khel a, kan naupa ding tam tak thil thar kan lak pek a, kan
u le nau hai ding khawm thilpek (gift) kan pek teu a, thuomhnaw thar
mawi tak le Krismas nipui ni a thu ka hril ni kha chu KRISMAS in umzie a
nei hle. Turuok hin chu ngaituona’n kil tin kil tang a hrut vel a, Mi a
nu/pa chân hai ta dingin krismas hi iem a ni ding o..! An naupa/naunu
chanhai sungkuo ta ding in krismas hi iem ning ata?? kan nu ta ding hin
teh iem a ni ve ding aw….!! kei a ta ding khawmin iem ani ve ding
leh…..!!
Kan nu hi khawpui a lekha inchuk a ni
leiin Krismas chau hi kan inhmuna hun um sun chu a nih. Ka ngaithei hle
leiin lekha ka thawn inzing thei hle. Ka nuor chang mi tlem a thiem hle
a, a mi duot bawk leiin a kuoma um chu inhawi ka ti thei hle a nih. Ka
Arasi ka damsunga var chu ama ngei hi a nih ti kan hmai nawh, muol milo
liemsan ding nisien khawm ka lungril inthuk taka chu var tawp thei ngai
naw nih. Kum tamtak liem ta hnunga kan nu tawngbau ka theinghil thei
naw; “Tlasik hung ni nawk a ta chu a chun ei lan hmu nawk ding an nawm
ie” ti’n a mi ngaizie hai lekha’n a mi hung thawn hlak a, a vel velin ka
tiem hlak. Krimas hun a hin chu inhawi kan ti thei hle a, ruolhai
khawmin min hnar thei hleng an tih. Ka phu lo Pathienin ngaizawng
hmeltha le fel em em a mi pek leiin a kuoma lawmthu ka hril mawl mawl
hlak.
A natna in inkiengzai a rel thei ta nawh
a. In ngai man a inchel sawng thei ding khawm kan ni ta bawk nawh ti
ka’n hriet!! December 25th,1996 zingkar ka thoin tukver ka hawnga, nisa
chu a lo insang ta hle. Kan nu hmel ka zuk en leh, a lo thang dai tah a,
imu inhnik taka ka in chu a mi chawkbuoi pei naw leia mi kei tho lo a
nih ti ka hriet. Thlai ka suong vat vat a, tui kan lum a, kan nu chu
tuilum chun puonte hmangin a panghai ka nawt fai peka, a thuomhnaw
thatak chu kan beltir bawka, kei le ka naupa khawm chu insil faiin kan
thuomhnaw tha hai kan in bel a, ka’n zo charin kan zalna pindan chu kan
naupa le kan pan a, sung inkhawm nei ding kan nih. Kan nu Bible chang
thlang ngei chu ka tiem a, “Ṭi naw unla, ngai ro, mi tin ta ding
chanchin tha lawmum bêk bêk ka hung intlun cheu a nih. Vawisun hin in ta
dingin Davida khuoa Sandamtu a pieng tah……..” !! Kan nu lo huoisen dan
hi mak ka ti khawp el, ka mitthli a tla a, kan nu ruok chu ka en ngam
nawh, ka mitthli tlak a hmu ding ka nuom ngai nawh, ka tap nuom naw
leiin thil dang dai ka hril hlem nawk a, kan nu hin ami zamsan hnung
khawma hlim dingin a mi dit a, a Bible chang thlang khawm chu ropui ka
ti hle. Keini sungkuo thina ko tlanga ngir, ka nuhmei ka duot ngawi
ngawi zuk boral el thei ding ngirhmuna ngir, chuhai sungkuo ta ding
khawma CHANCHIN LAWM UM BEK BEK chu Lal Krista hung pieng ngei hi ani
zie ka’n nu chun a lo hmu chieng hle a, chu ngei chu a mi lo hril nuom a
nih, ti chu kan hmai nawh. Kan sum zo lul naw leiin ka bienga mitthli
chu ka hruk mawl mawl a, kan nu chu ka en ngawm nawh, a bienga mitthli
far tuk tuk chun ami suk tap deu deu ding a nih ti ka hriet a. Hla kan
saknawna a sawt tah, hlasak lengkhawm hai a khawm kan thang theinaw ding
a ni ti kan in hriet bawk. Thei le thei loin hla kan hang sak a, a
thunawn, “Tapna ram lungngaina khawvel ka cheng laiin lungruolna Zion
tlang chunga ei lengkar ka nghak hla”, kan sak zawm thei ta nawh.
Kan nu a khata a fe ding chu ka phal
thei lul nawh, tlan hmunkhata zal a lungruolna Zion khawpui a hlim taka
kan leng khawm ding chu a let tamin ka tlang lem si a. Thi chu nuom hle
lang khawm ka thu a ni si nawh. Kan nu’n keiin tawngtaina chu nei ka tih
a ti leiin khum a chun ka kai a, kan naupa le kan lu chunga a kut in
nghatin “Aw Lalpa, ka pasal le ka naupa hi ka va hang zamsan ngam naw de
aw! Ka ngai ngawi ngawi a nih ti i hriet ie, Pa. I remruotna chu sel
thei ding ka ni si nawh. Ka zamsan hnunga nangin i enkawl ding a nih ti
ka hriet leiin ka thla a muong em em el a nih. Pa, vawisun ruok hin chu
kan khawvel khawsawtna le beidawngna hai mi la kieng pek la CHANCHINTHA
LAWM UM BEK BEK HI hi insunga intlun ta ang hrimin lawm taka chu
chanchintha chu kan lo dawng ve theina dingin kan lungril mi hung sawi
danglam pek rawh”, ti’n.
Ka miththli tlak zing hi a nuom ta naw
a, hrat dingin a mi dit a nih ti chu ka hriet tah. Insuk pasal a naute
hlim tak a chibai buk chu thalem ding ni’n ka hriet bawk a. Kan nu’n a
puon tha tha hai chu a min keidawk tir a, kan Krismas thuomhnaw dinga
kan chawk iem a ni zat le chun…(Kan nu hriet zingna dinga hi Krismas hi
kum dang naw angtak a hmang kan tum a nih. Kan sung le kuo hai neka
pasie lem tamtak Lal nau lawmna dinga thuomthar tak meu khawm inchaw zo
lo an um ti kan hriet si a) tha tak a tuomin Krismas GIFT ti’n ka semvel
tawl a, a sunga iem a um ti ruok chu la hre naw hai sienkhawm an lawm
hle ti ruok chu ka hriet. A sunga thil um an hmu hnungin lawm nawk zuol
an tih ti kan hmai nawh, asanchu kan dit lai ngawi ngawi keini ngei
khawma kan la hmang lo thuomhnaw man tam tak tak dam an ni leiin. In ka
hung kir a, kan nu hmel chu hlim deuin a lo in nui sieu a, kei khawm ka
hlim hle. Kan naupa ruok chu nal taka incheiin biekin a fe di’n a ruol
hai a zui a. Chuongchun Krismas chu lungawi takin kan hmang zo tah a.
A zinga chawhnung dar khat vel in kan nu
chun a mi boral san tah a. Zantieng thimbutin a ruong vuiliem in, zana
khawtlangin mithi sunna programme an mi hmangpui a. Kan nu bo a hun le
ni ka hmang ding ka zuk hriet suok phat ka hrietnaw kar ka mithli a lo
tla nawk hlak. Thalai ha’n hlapawl an hung sak a, a thunawn, “Hla tak a
ram mawi a chun, lunghlu kawtkhar mawi tak chu ei ta di’n an hawng mek a
nih, rangkachak khawpui mawi a ei lut vak ding, inpak ei tiu hi hnuoi
ram mi ei ni nawh” tiin. Lungril a fang khawp el a, tap ding am a nih in
nui ding ti khawm ka hriet naw hiel a. Kan nu kuoma fe kar chu ka
nghakhla ta em em a, ka mithla’n kan lan hmu nawk hun ding dam ka hmu a,
hmu kar ka nghak hla hle. Mi an tin zo hnungin tuol ka suok a, van
tieng ka hang en a, ka chunglaizawn taka SIRUK(arasi paruk in kawp
thlasik lai a inlang hlak) ka hmu thei, a kawl vela Arasi var tha em em
ka hmu a, ka en zinga ama khawma a mi hung en ve ni dingin ka hmu tlat,
chu ngei chu kan nu ni dingin ka ringa, van a arasi hai anga varin an
thuom lem an tah ti ka hriet a, ka lawm hle. Chuong chun innui sieuin in
ka lut a, kan khum a ka naupa chu a lo in bawr bawr a, kei khawm ka zal
hadam ta lem a.
Ka nunhlui liem ta hnung hai ka zuk
suikir chu lung a suk len hle, ka hriet naw kar ka mitthli chu a lo tla
zung zung a. Kan nu’n a mi maksanna kum tamtak a liem ta ti khawm ka
hriet a, kan nu’n, “Tlasik hung ni nawk a ta, chu a chun ei lan hmu nawk
ding an nawm ie”, a ti khawm ka theinghil thei nawh. Thlasik chu vel
tam tak liemin, hung inher kir nawk hlak sien khawm, kan nu ruok chu a
hung kir nawk ta nawh.
A tawp tah!